ירמיהו. פסוקים

*

רָאִיתִי אֶת הָאָרֶץ וְהִנֵּה תֹהוּ וָבֹהוּ

וְאֶל הַשָּׁמַיִם וְאֵין אוֹרָם

רָאִיתִי הֶהָרִים וְהִנֵּה רֹעֲשִׁים

וְכָל הַגְּבָעוֹת הִתְקַלְקָלוּ

 

 

*

הִנְנִי מֵבִיא עֲלֵיכֶם גּוֹי מִמֶּרְחָק בֵּית יִשְׂרָאֵל נְאֻם-יְהוָה

גּוֹי אֵיתָן הוּא

גּוֹי מֵעוֹלָם הוּא

גּוֹי לֹא-תֵדַע לְשֹׁנוֹ

וְלֹא תִשְׁמַע מַה-יְדַבֵּר

*

אַשְׁפָּתוֹ כְּקֶבֶר פָּתוּחַ

 

*

כִּכְלוּב מָלֵא עוֹף כֵּן בָּתֵּיהֶם מְלֵאִים מִרְמָה

עַל-כֵּן גָּדְלוּ

וַיַּעֲשִׁירוּ

 

*

בָּעֵת הַהִיא נְאֻם-יְהוָה יוֹצִיאוּ אֶת-עַצְמוֹת מַלְכֵי-יְהוּדָה וְאֶת-עַצְמוֹת-שָׂרָיו וְאֶת-עַצְמוֹת הַכֹּהֲנִים וְאֵת עַצְמוֹת הַנְּבִיאִים וְאֵת עַצְמוֹת יוֹשְׁבֵי-יְרוּשָׁלִָם מִקִּבְרֵיהֶם

וּשְׁטָחוּם לַשֶּׁמֶשׁ וְלַיָּרֵחַ וּלְכֹל צְבָא הַשָּׁמַיִם אֲשֶׁר אֲהֵבוּם וַאֲשֶׁר עֲבָדוּם וַאֲשֶׁר הָלְכוּ אַחֲרֵיהֶם  וַאֲשֶׁר דְּרָשׁוּם  וַאֲשֶׁר הִשְׁתַּחֲווּ לָהֶם:

לֹא יֵאָסְפוּ וְלֹא יִקָּבֵרוּ

לְדֹמֶן עַל-פְּנֵי הָאֲדָמָה יִהְיוּ

וְנִבְחַר מָוֶת מֵחַיִּים לְכֹל הַשְּׁאֵרִית

הַנִּשְׁאָרִים

מִן הַמִּשְׁפָּחָה הָרָעָה הַזֹּאת

 

*

אֲשֶׁר לַמָּוֶת לַמָּוֶת

וַאֲשֶׁר לַחֶרֶב לַחֶרֶב

וַאֲשֶׁר לָרָעָב לָרָעָב

וַאֲשֶׁר לַשְּׁבִי לַשֶּׁבִי

וּפָקַדְתִּי עֲלֵיהֶם אַרְבַּע מִשְׁפָּחוֹת נְאֻם-יְהוָה

אֶת הַחֶרֶב לַהֲרֹג

וְאֶת-הַכְּלָבִים לִסְחֹב

וְאֶת-עוֹף הַשָּׁמַיִם וְאֶת-בֶּהֱמַת הָאָרֶץ

לֶאֱכֹל

וּלְהַשְׁחִית

 

*

כֹּה אָמַר יְהוָה הָלֹךְ וְקָנִיתָ בַקְבֻּק יוֹצֵר חָרֶשׂ […]

וְיָצָאתָ אֶל-גֵּיא בֶן-הִנֹּם  אֲשֶׁר פֶּתַח שַׁעַר הַחַרְסִית;

וְקָרָאתָ שָּׁם אֶת-הַדְּבָרִים אֲשֶׁר-אֲדַבֵּר אֵלֶיךָ

[…] וְשָׁבַרְתָּ  הַבַּקְבֻּק לְעֵינֵי הָאֲנָשִׁים הַהֹלְכִים אוֹתָךְ

וְאָמַרְתָּ אֲלֵיהֶם

כֹּה-אָמַר יְהוָה צְבָאוֹת

כָּכָה אֶשְׁבֹּר אֶת-הָעָם הַזֶּה

וְאֶת-הָעִיר הַזֹּאת

כַּאֲשֶׁר יִשְׁבֹּר אֶת-כְּלִי הַיּוֹצֵר אֲשֶׁר לֹא-יוּכַל לְהֵרָפֵה עוֹד

 

*

הָלֹךְ וְאָמַרְתָּ אֶל-צִדְקִיָּהוּ מֶלֶךְ יְהוּדָה

וְאָמַרְתָּ אֵלָיו כֹּה אָמַר יְהוָה

הִנְנִי נֹתֵן אֶת-הָעִיר הַזֹּאת בְּיַד מֶלֶךְ-בָּבֶל וּשְׂרָפָהּ בָּאֵשׁ

וְאַתָּה

לֹא תִמָּלֵט מִיָּדוֹ

כִּי תָּפֹשׂ תִּתָּפֵשׂ

וּבְיָדוֹ תִּנָּתֵן

וְעֵינֶיךָ

אֶת-עֵינֵי מֶלֶךְ-בָּבֶל תִּרְאֶינָה

וּפִיהוּ אֶת-פִּיךָ

יְדַבֵּר

וּבָבֶל תָּבוֹא

 

*

כֹּה-אָמַר יְהוָה אַתֶּם לֹא-שְׁמַעְתֶּם אֵלַי

לִקְרֹא דְרוֹר אִישׁ לְאָחִיו וְאִישׁ לְרֵעֵהוּ

הִנְנִי קֹרֵא לָכֶם דְּרוֹר נְאֻם-יְהוָה

אֶל-הַחֶרֶב

אֶל-הַדֶּבֶר

וְאֶל-הָרָעָב

וְנָתַתִּי אֶתְכֶם לְזַעֲוָה לְכֹל מַמְלְכוֹת הָאָרֶץ

 

*

וַיֹּאמֶר הַמֶּלֶךְ צִדְקִיָּהוּ הִנֵּה-הוּא בְּיֶדְכֶם: כִּי-אֵין הַמֶּלֶךְ יוּכַל אֶתְכֶם דָּבָר

וַיִּקְחוּ אֶת-יִרְמְיָהוּ

וַיַּשְׁלִכוּ אֹתוֹ אֶל-הַבּוֹר […] אֲשֶׁר בַּחֲצַר הַמַּטָּרָה

וַיְשַׁלְּחוּ אֶת-יִרְמְיָהוּ בַּחֲבָלִים

וּבַבּוֹר אֵין-מַיִם כִּי אִם-טִיט

*

וַיִּטְבַּע יִרְמְיָהוּ בַּטִּיט

 

*

מַפֵּץ-אַתָּה לִי כְּלֵי מִלְחָמָה

וְנִפַּצְתִּי בְךָ גּוֹיִם

וְהִשְׁחַתִּי בְךָ מַמְלָכוֹת

וְנִפַּצְתִּי בְךָ  סוּס וְרֹכְבוֹ

וְנִפַּצְתִּי בְךָ רֶכֶב וְרֹכְבוֹ

וְנִפַּצְתִּי בְךָ אִישׁ וְאִשָּׁה

וְנִפַּצְתִּי בְךָ זָקֵן וָנָעַר

וְנִפַּצְתִּי בְךָ בָּחוּר וּבְתוּלָה

וְנִפַּצְתִּי בְךָ רֹעֶה וְעֶדְרוֹ

וְנִפַּצְתִּי בְךָ אִכָּר וְצִמְדּוֹ

וְנִפַּצְתִּי בְךָ פַּחוֹת וּסְגָנִים